O‘zbekiston ta’lim, fan va madaniyat xodimlari kasaba uyushmasi Koson tuman kengashi tomonidan mehnat jamolarida sportning ommaviy turlari bo‘yicha tizimli ravishda musobaqalar o‘tkazib borish an’ana tusiga kirgan.
Ayniqsa, xotin-qizlar o‘rtasida o‘tkaziladigan sport musobaqalari xodimlarning orziqib kutadigan ommaviy tadbiri ahamiyatini kasb etgan.
“Xalq bilan muloqot va inson manfaatlari yili” dasturi doirasida tuman kengashi tashabbusi bilan xotin-qizlar kasaba uyushmalari a’zolari o‘rtasida “Sport- salomatlik garovi” shiori ostida ikki bosqichli sport musobaqalari o‘tkazildi. Mazkur musobaqlarni o‘tkazishdan ko‘zlangan maqsad xotin-qizlar o‘rtasida sportning ommaviyligini ta’minlash, xotin-qizlarni jismoniy-tarbiya va sportga keng jalb etish, jismoniy chiniqtirish, salomatligini mustahkamlashdan iboratdir. Musobaqalar sportning 6 ta – voleybol, yengil atletika, shashka, stol tennisi, armsterling va arqon tortish kabi turlari bo‘yicha o‘tkazildi. Musobaqaning birinchi (tashkilot, muassasa) bosqichida 800 nafardan, ikkinchi (tuman) bosqichida esa 200 nafardan ortiq xotin-qizlar ishtirok etishdi. Musobaqalar tasdiqlangan Nizom va baholash mezonlari asosida tashkiliy qo‘mita va malakali hakamlar boshqaruvida o‘tkazildi.
Joriy yilning 22-aprel kuni tumandagi 26-umumiy o‘rta ta’lim maktabida o‘tkazilgan musobaqaning ikkinchi bosqichi tom ma’noda sport bayramiga aylanib ketdi.
Do‘stona raqobat ostida o‘tgan mazkur musobaqada sportning voleybol turi bo‘yicha 33-umumiy o‘rta ta’lim maktabi jamoasi, 100 metrga yugurish bo‘yicha mazkur maktab ishchisi Oftob Jumaeva, stol tennisi bo‘yicha pedagogika iqtisodiyot kolleji o‘qituvchisi Ra’no Sharipova, shashka turi bo‘yicha sanoat transport kasb-hunar kolleji o‘qituvchisi Fotima Otamurodova, arqon tortish turi bo‘yicha 75-umumiy o‘rta ta’lim maktabi, armsterling turi bo‘yicha 5-umumiy o‘rta ta’lim maktabi o‘qituvchisi Rufiya Sharipovalar g‘oliblikni qo‘lga kiritdilar.
Bundan tashqari, musobaqa Nizomiga ko‘ra 6 ta nominatsiya bo‘yicha ham g‘oliblar aniqlandi.
Musobaqa g‘oliblari tuman kengashining diplom va esdalik sovg‘alari bilan taqdirlandilar.
Yangiliklar