Kasaba uyushmalarining turizmni rivojlantirish borasidagi faoliyati tobora kengayib bormoqda. Ta'lim, fan va madaniyat xodimlari kasaba uyushmasi G‘ijduvon tuman kengashi tomonidan 2015 yilga mo‘ljallangan ish rejasiga binoan yil davomida tarmoq xodimlari, ularning oila a'zolari respublikamizning tarixiy shaharlari, mustaqillik yillarida barpo etilgan inshootlari bilan tanishtirish maqsadida bir qator tadbirlar belgilangan. 2015 yil “Kenksalarni e'zozlash yili” deb e'lon qilinishi munosabati bilan ilk sayohat ta'lim va madaniyat muassasalarida uzoq yillar davomida mehnat qilib, qarilik gashtini surayotgan otaxonlar va onaxonlar uchun tashkil etildi. 35 nafar keksa ustozlar Buxoro viloyatining “Yetti pir” ziyoratgohlariga, tarixiy va muqaddas qadamjolarga tashrif buyurib, ota-bobolar merosi hamda shahar, qishloqlarimizning bugungi kun qiyofasi bilan yaqindan tanishdilar. Ota-bobolarimiz hoki-poyi bo‘lgan qadamjolar bo‘ylab sayohat qilgan keksalar ko‘nglida tariximizga hurmat, bugungi kunimizga shukrona, bunyodkorlik ishlaridan iftixor tuyg‘ulari mujassam bo‘ldi.