«Кексалар ҳафталиги» доирасида: Фарғоналик нуроний устозлар Тошкент ва Самарқанд шаҳарларини зиёрат қилдилар
Ўзбекистон Республикасида кекса авлод вакилларига бўлган юксак ҳурмат ва эътиборни янада кучайтириш, уларни ижтимоий қўллаб-қувватлаш, саломатлигини муҳофаза қилиш ҳамда жамиятдаги фаол иштирокини таъминлаш давлатимиз сиёсатининг устувор йўналишларидан саналади. Вазирлар Маҳкамасининг 2019 йил 27 сентябрдаги 816-сон қарорига мувофиқ, ҳар йили октябрь ойининг биринчи ҳафтаси мамлакатимизда «Кексалар ҳафталиги» сифатида кенг нишонланиб келинмоқда. Ушбу ҳафталикнинг асосий мақсади нуронийларимизга эҳтиром кўрсатиш, уларнинг турмуш шароитини яхшилашга кўмаклашиш ва бой ҳаётий тажрибасидан ёшлар тарбиясида оқилона фойдаланишдан иборатдир.
Ана шундай эзгу мақсадларни ўзида мужассам этган мазкур ҳафталик доирасида 2026 йилнинг 5 октябрь куни Фарғона вилоятида ҳам хайрли тадбир амалга оширилди. Таълим ва фан ходимлари касаба уюшмаси Республика кенгашининг Фарғона вилояти бўйича масъул ташкилотчиси ҳамда вилоят Мактабгача ва мактаб таълими бошқармаси ташаббуси билан таълим тизимида узоқ йиллар самарали меҳнат қилиб, соҳа ривожига улкан ҳисса қўшган 50 нафар нуроний ва фахрий устозлар учун маданий-маърифий саёҳат ташкил этилди.
Саёҳат дастурига кўра, фахрий устозлар дастлаб пойтахтимиз Тошкент шаҳрида қад ростлаган Ислом цивилизацияси маркази ҳамда Ўзбекистон Республикасининг Биринчи Президенти Ислом Каримов музейида бўлиб, бунёдкорлик ишлари ва тарихий хотиралар билан яқиндан танишдилар.
Шундан сўнг, саёҳат қадимий ва навқирон Самарқанд шаҳрида давом этди. Нуронийларимиз қуйидаги муқаддас қадамжолар ва тарихий-меъморий обидаларни зиёрат қилдилар:
- Имом ал-Бухорий мажмуаси;
- Мирзо Улуғбек расадхонаси;
- Маҳобатли Регистон майдони;
- Шоҳи Зинда мажмуаси;
- Амир Темур мақбараси ва Бибихоним масжиди;
- Биринчи Президент Ислом Каримов мақбараси ва уй-музейи.
Мазкур мазмунли саёҳат фахрий устозларга нафақат руҳий-маънавий озуқа ва кўтаринки кайфият бағишлади, балки уларнинг ёш авлод таълим-тарбияси йўлидаги кўп йиллик фидокорона меҳнатларига кўрсатилган юксак эътибор ва чексиз эҳтиромнинг ёрқин намунаси бўлди.
