ИНСОН ҚАДРИ ВА МЕҲНАТ СУБҲИ: ҚЎШРАБОТДА 11 НОЯБРЬ — ЎЗБЕКИСТОН КАСАБА УЮШМАЛАРИ КУНИ ТАНТАНАЛИ НИШОНЛАНДИ

Мамлакатимизда 11 ноябрь — Ўзбекистон касаба уюшмалари куни сифатида кенг нишонланиши ажойиб анъанага айланган. Шу муносабат билан Қўшработ туманида меҳнаткашларнинг шарафли ва машаққатли хизматини эътироф этишга бағишланган тантанали байрам тадбири юқори савияда ташкил этилди. Анжуманда тумандаги таълим, фан ва бошқа соҳаларда фаолият юритаётган касаба уюшмаси фаоллари, фидойи ходимлар, фахрийлар ҳамда кенг жамоатчилик вакиллари иштирок этдилар. Тадбир давомида касаба уюшмаларининг жамиятдаги ўрни ва ходимларнинг ижтимоий-ҳуқуқий ҳимоясини таъминлаш борасидаги эзгу ишлари алоҳида эътироф этилди.

Мазкур тантанали тадбирнинг асосий мақсади — турли соҳаларда, хусусан, таълим ва фан тизимида ҳалол меҳнат қилаётган ходимларни қўллаб-кувватлаш, уларнинг заҳматли меҳнатини муносиб қадрлаш ҳамда касаба уюшмалари тизимида эришилаётган ютуқларни кенг жамоатчиликка етказишдан иборат бўлди. Тадбирни кириш сўзи билан очар экан, мутасаддилар ходимлар манфаатини ҳимоя қилиш ва уларга муносиб шароит яратиш давлат ва жамият тараққиётининг муҳим омили эканини алоҳида таъкидладилар.

Бугунги кунда Қўшработ туманида соҳанинг равнақи ва ижтимоий муҳофазасини мустаҳкамлаш борасида салмоқли ишлар амалга оширилмоқда. Рақамларга мурожаат қиладиган бўлсак, тумандаги 127 та ташкилот ва муассасада жами 7 640 нафар касаба уюшмаси аъзоси самарали фаолият юритиб келмоқда. Уларнинг салмоқли қисмини айнан таълим ва фан соҳаси вакиллари, мактаб ва мактабгача таълим муассасалари ходимлари ташкил этади. Таълим ва фан ходимлари касаба уюшмаси томонидан ушбу ходимларга муносиб меҳнат шароитларини яратиш, уларнинг соғлиқларини тиклаш ҳамда маданий ҳордиқ чиқаришларини ташкил этишда доимий молиявий ва маънавий кўмак кўрсатиб келинмоқда.

Анжуманда бир қатор фаол ва масъулиятли вакиллар иштирок этиб, ўзларининг самимий тилаклари ва мазмунли маърузалари билан тадбирнинг нуфузини янада оширдилар. Жумладан, туман касаба уюшмалари кенгаши раиси А. Тўхтаров, Туман «Маърифат» тарғиботи ишлари жамияти аъзоси Н. Усмонов ҳамда «Истиқбол сари» газетаси бош муҳаррири Х. Мамарасуловлар сўзга чиқиб, тизимда амалга оширилаётган ислоҳотлар ва эришилаётган натижалар ҳақида атрофлича тўхталиб ўтдилар. Сўзга чиққанлар томонидан касаба уюшмаларининг меҳнаткашлар ҳуқуқ ва манфаатларини ҳимоя қилишдаги роли беқиёс экани уқтирилди.

Тадбир давомида касаба уюшмалари фаолиятининг маданий-маърифий ва ижтимоий аҳамияти ҳақида атрофлича фикр юритилди. Хусусан, қуйидаги устувор йўналишларга алоҳида эътибор қаратилди:

• Ходимларнинг меҳнат ҳуқуқлари ва қонуний манфаатларини мустаҳкамлаш, улар учун хавфсиз ва муносиб меҳнат шароитларини яратиш;
• Таълим ва фан соҳаси ходимларининг ижтимоий муҳофазасини кучайтириш, уларни молиявий ва маънавий жиҳатдан мунтазам рағбатлантириб бориш;
• Соҳада кўп йиллар давомида самарали меҳнат қилган фахрий нуронийларни эъзозлаш, уларнинг бой тажрибасини ёш мутахассисларга ўргатиш;
• Меҳнаткашлар ва уларнинг оила аъзолари учун соғломлаштириш ҳамда маърифий-маданий тадбирларни тизимли равишда ташкил этиш.

Байрамнинг энг ҳаяжонли ва қувончли дақиқалари мукофотлаш маросими билан давом этди. Кўп йиллик фидокорона меҳнати ва жамоат ишларидаги фаоллиги билан ажралиб турган касаба уюшмаси фаоллари, соҳа ходимлари ҳамда заҳматкаш фахрий нуронийларга Таълим ва фан ходимлари касаба уюшмаси ҳамда ташкилотчилар томонидан қимматбаҳо эсдалик совғалари ва фахрий ёрлиқлар топширилди.

Самимий табриклар ва эзгу тилакларга бой бўлган ушбу байрам тадбири иштирокчиларда чуқур таассурот қолдириб, уларга кўтаринки кайфият ва янги меҳнат зафарларига илҳом бағишлади. Таълим ва фан ходимлари касаба уюшмаси барча касаба уюшмаси аъзоларини ва фидойи меҳнаткашларни касб байрами билан яна бир бор чин қалбдан муборакбод этади!