Бўстонлиқ туманида «Янги Ўзбекистон — янги касаба уюшмалари» шиори остида маърифий тадбир бўлиб ўтди

Таълим ва фан ходимлари касаба уюшмаси томонидан ташкил этилган мазкур тадбир ўзининг мазмун-моҳияти билан соҳа ходимлари ўртасида катта қизиқиш уйғотди. Тадбирнинг асосий мақсади – таълим муассасаларида меҳнат муҳофазаси қоидаларига риоя этилишини таъминлаш, ходимларнинг ижтимоий-иқтисодий манфаатларини ҳимоя қилиш ҳамда касаба уюшмаларининг жамиятдаги ўрни ва нуфузини янада оширишдан иборат бўлди.

Тадбирда Ўзбекистон таълим ва фан ходимлари касаба уюшмаси Республика кенгашининг меҳнат муҳофазаси бўйича бош мутахассиси Д. Самарбеков, Республика кенгашининг Тошкент вилояти бўйича масъул ташкилотчиси Р. Ғазиева, ЎКУФ Тошкент вилояти кенгаши меҳнат-техник инспектори Ш.Хазраткулов ҳамда Бўстонлиқ тумани кенгаши раиси Э. Шокировлар иштирок этишди. Меҳнат муҳофазаси бўйича ўтказилган ўқув семинари давомида соҳадаги янгиликлар, қонунчиликка киритилган ўзгаришлар ва меҳнат шароитларини яхшилаш борасидаги долзарб вазифалар муҳокама қилинди.

Семинарнинг маданий-маърифий ва амалий аҳамияти қуйидагиларда намоён бўлди:

• Бошланғич касаба уюшма ташкилотлари раислари меҳнат муҳофазасига оид ҳужжатларни юритиш бўйича амалий кўникмаларга эга бўлдилар.
• Ходимларнинг меҳнат ҳуқуқларини ҳимоя қилишда касаба уюшмаларининг назорат функцияларини кучайтириш механизмлари белгилаб олинди.
• Иштирокчилар ўртасида ўзаро тажриба алмашиш ва соҳага оид муаммоларни биргаликда ҳал этиш бўйича фикр алмашилди.
• «Янги Ўзбекистон — янги касаба уюшмалари» ғояси асосида жамоаларда соғлом ва хавфсиз муҳитни яратишнинг аҳамияти тушунтирилди.

Тадбир сўнггида фаол иштирок этган ҳамда ўз иш фаолиятида юқори натижаларга эришиб келаётган бир гуруҳ бошланғич касаба уюшма ташкилотлари раислари Бўстонлиқ тумани кенгашининг фахрий ёрлиқлари ва қимматбаҳо совғалари билан тақдирландилар. Ушбу рағбатлантириш тадбири касаба уюшмаси ходимларининг келгусидаги ишларига катта руҳ бағишлаши шубҳасиз.

Ташкил этилган мазкур тадбир таълим соҳаси ходимларини бирлаштириш, уларнинг ижтимоий ҳимоясини кучайтириш ҳамда касаба уюшмаларининг меҳнат жамоаларидаги нуфузини янада мустаҳкамлашда муҳим қадам бўлди. Ўзбекистон таълим ва фан ходимлари касаба уюшмаси бундан кейин ҳам ўз аъзоларининг ҳуқуқ ва манфаатларини ҳимоя қилиш, уларнинг меҳнат шароитларини яхшилаш борасидаги хайрли ишларини изчил давом эттиради.