Paxtachi tumanida 3-dekabr nogironlar kuni munosabati bilan sport musobaqasi o‘tkazildi
Bugun Paxtachi tumanidagi MOJOR sport majmuasida o‘tkazilgan tadbirda Ta’lim va fan xodimlari kasaba uyushmasi hamda tuman INSON ijtimoiy markazi hamkorlikda tashkilotchilik qilgan sport musobaqasi bo‘lib o‘tdi. Tadbir, «3-dekabr – Xalqaro nogironlar kuni» munosabati bilan, tizimda faoliyat yuritayotgan kasaba uyushmasi a’zolari va xodimlarining imkoniyati cheklangan farzandlari o‘rtasida sportning stol tennisi va yengil atletika turlarida tashkil etildi.
Musobaqa sportni sevuvchi, faollik va qatnashish istagini bildirgan bolalar uchun ajoyib imkoniyat yaratdi. Tadbirda ishtirok etgan barcha yosh sportchilar o‘zlarining jismoniy tayyorgarliklari va sportga bo‘lgan qiziqishlarini ko‘rsatdilar. Stol tennisi va yengil atletika turlari bo‘yicha o‘tkazilgan musobaqa, nafaqat sportning tarbiyaviy, balki jamiyatdagi nogironligi bo‘lgan insonlarning imkoniyatlarini kengaytirishga qaratilgan muhim bir tadbir bo‘ldi.
Musobaqa davomida ishtirokchilar o‘zlarining eng yaxshi natijalarini ko‘rsatish uchun kurash olib bordilar. Sport musobaqasining g‘oliblari va faol ishtirokchilari taqdirlandi. Har bir g‘olibga diplom va esdalik sovg‘alari topshirildi. Tadbirning asosiy maqsadi – nogironligi bo‘lgan yoshlarni qo‘llab-quvvatlash, ularning imkoniyatlarini rivojlantirish va sport orqali jamiyatdagi o‘rni va ahamiyatini oshirishdir.
Tadbir yakunida barcha ishtirokchilarga minnatdorchilik bildirilgan bo‘lib, bunday musobaqalar davom ettirilishi va sportni rivojlantirish yo‘nalishidagi sa’y-harakatlar davom ettirilishiga qat’iy ishonch bildirildi. Musobaqa g‘oliblari, sport orqali o‘zlarining yuksak natijalariga erishishdan tashqari, sog‘lom va faol hayot tarzini qo‘llab-quvvatlashda yangi imkoniyatlarga ega bo‘lishdi.
Ta’lim va fan xodimlari kasaba uyushmasi Paxtachi tuman kengashi
