Ўзбекистон Фанлар академиясида спорт мусобақалари ўтказилди
Бугун Ўзбекистон Фанлар академияси Бирлашган касаба уюшмаси қўмитаси томонидан йил якунлари муносабати билан Астрономия институтида спорт мусобақалари ташкил этилди. Мазкур тадбир доирасида аёллар ва эркаклар ўртасида стол тенниси ҳамда шахмат мусобақалари бўлиб ўтди.
Мусобақаларда институтнинг ходимлари фаол иштирок этишди. Беллашувлар соғлом рақобат ва жамоадошлик руҳида ўтди. Иштирокчилар ўз маҳоратларини намоён этиб, ўз соҳасидаги устунлигини кўрсатишга ҳаракат қилишди.
Ғолиблар ва совриндорлар Бирлашган қўмита томонидан дипломлар ва эсдалик совғалари билан тақдирландилар. Бу каби тадбирлар ходимлар ўртасида дўстона муносабатларни мустаҳкамлаш, жамоавий ҳамкорликни кучайтириш ҳамда соғлом турмуш тарзини тарғиб қилишга хизмат қилади.
Тадбир қатнашчилари мазкур мусобақалардан олган таассуротлари билан ўртоқлашар экан, бу каби лойиҳаларнинг доимий равишда ташкил этилишини олқишладилар ва келгуси йилларда ҳам янги спорт турлари бўйича беллашувлар ўтказилишини кутишларини билдиришди.
Ўзбекистон Фанлар академияси Бирлашган касаба уюшмаси қўмитаси
