Юнусобод туманида меҳнат жамоасининг умумий йиғилиши ва касаба уюшма ташкилотининг ҳисобот-сайлов йиғилиши бўлиб ўтди
2025 йил 18 март куни Тошкент шаҳрининг Юнусобод туманида жойлашган 30-сонли давлат мактабгача таълим ташкилотида муҳим тадбир бўлиб ўтди. Унда жамоа шартномасининг 2024 йилда бажарилиши таҳлил қилиниб, 2020-2025 йиллар учун 5 йиллик ҳисобот-сайлов йиғилиши ўтказилди. Йиғилишда мазкур ташкилотнинг раҳбарияти, тарбиячилар, техник ходимлар ҳамда касаба уюшмаси аъзолари фаол иштирок этди. Йиғилишда сўзга чиққан Бошланғич касаба уюшмаси қўмитаси раиси Н.Собирова сўнгги 5 йил давомида амалга оширилган ишлар юзасидан атрофлича ҳисобот берди. У ўз маърузасида ходимларнинг меҳнат шароитларини яхшилаш, уларнинг ижтимоий ҳимоясини кучайтириш, маданий-маърифий тадбирларни ташкил этиш ҳамда ходимларнинг ҳуқуқ ва манфаатларини ҳимоя қилиш борасида амалга оширилган ишлар ҳақида сўзлади. Шунингдек, молиявий ёрдамлар, моддий рағбатлантириш, тиббий суғурта ва бошқа қўшимча ижтимоий кафолатлар бўйича қилинган ишлар таҳлил қилинди.Йиғилиш доирасида 2025-2030 йилларга мўлжалланган Бошланғич касаба уюшмаси қўмитаси раиси сайлов жараёни ҳам ўтказилди. Сайлов очиқ овоз бериш йўли билан амалга оширилди ва унда касаба уюшмаси аъзолари бир овоздан яна Н.Собировани мазкур лавозимга қайта сайлашди. Бу эса унинг жамоа олдидаги нуфузи ва меҳнаткашлар орасидаги ишончининг юқорилигини намойиш этди.Йиғилишда Ўзбекистон таълим ва фан ходимлари касаба уюшмаси Республика кенгаши бухгалтери Х.Нуриддинов ҳам иштирок этиб, сўзга чиқди. У мамлакатимизда касаба уюшмалари фаолиятини такомиллаштириш, ходимларнинг ижтимоий ҳимоясини кучайтириш борасида амалга оширилаётган ишлар ҳақида фикр билдирди. Шунингдек, у касаба уюшмаси аъзоларини жипслашган ҳолда фаолият юритишга, меҳнаткашларнинг ҳуқуқ ва манфаатларини ҳимоя қилишда янада самарали иш олиб боришга чорлади. Йиғилиш қатнашчилари томонидан билдирилган таклиф ва мулоҳазалар тингланиб, келгуси йиллар учун режалар белгилаб олинди. Тадбир самимий руҳда ва конструктив муҳокамалар билан якунланди.
Ўзбекистон таълим ва фан ходимлари касаба уюшмаси Юнусобод туман бўлинмаси кенгаши
