Нукус шаҳрида меҳнат жамоасининг умумий йиғилиши ва касаба уюшма ташкилотининг ҳисобот-сайлов йиғилиши бўлиб ўтди
2025 йил 18 март куни Нукус шаҳридаги 19-сонли умумтаълим мактабида Ўзбекистон таълим ва фан ходимлари касаба уюшмаси Нукус шаҳар бўлинмаси кенгаши тасарруфидаги жамоа шартномасининг 2024 йилда бажарилиши ҳамда 2025 йил учун жамоа шартнома бандларига ўзгартириш ва қўшимчалар киритиш, шунингдек, ҳисобот-сайлов юзасидан муҳим йиғилиш бўлиб ўтди.
Йиғилишда шаҳар бўлинмаси кенгаши раиси М. Даулбаев, мактаб маъмурияти, касаба уюшма аъзолари, ўқитувчилар ва бошқа манфаатдор шахслар иштирок этишди. Тадбирнинг асосий мақсади 2023-2025 йилларга мўлжалланган жамоа шартномасининг амалий ижросини таҳлил қилиш, келгуси йил учун таклиф ва ўзгартиришларни муҳокама қилиш ҳамда касаба уюшманинг янги раҳбариятини сайлашдан иборат эди.
Йиғилиш давомида Жамоа шартномаларининг бажарилиши юзасидан иш берувчи ҳамда касаба уюшмаси раисининг ҳисоботлари тингланди. Ҳисоботларда асосий эътибор таълим ходимларининг ижтимоий ҳимояси, меҳнат шарт-шароитларини яхшилаш ва маошларнинг ўз вақтида тўланишини таъминлаш каби масалаларга қаратилди. Шунингдек, ўқитувчиларнинг малакасини ошириш, уларга моддий ва маънавий рағбат тизимини янада такомиллаштириш бўйича олиб борилган ишлар таҳлил қилинди. Йиғилиш қатнашчилари ушбу масалалар юзасидан ўз фикр-мулоҳазаларини билдиришди, ҳамда таклифлар беришди.
Бундан ташқари, ҳисобот-сайлов йиғилиши муносабати билан бошланғич касаба уюшма раислари 2020-2025 йиллар бўйича ўз фаолиятлари ҳақида кенг қамровли ҳисобот бердилар. Ушбу ҳисоботларда амалга оширилган ишлар, эришилган натижалар ва мавжуд муаммолар батафсил ёритилди. Берилган ҳисоботлар касаба уюшма аъзолари томонидан қониқарли деб топилди ва йиғилиш иштирокчилари томонидан тасдиқланди.
Йиғилишнинг навбатдаги қисмида бошланғич касаба уюшмасининг янги раиси ҳамда аъзолари сайланди. Сайлов жараёни очиқ ва демократик руҳда ўтказилиб, барча иштирокчиларга тенг ҳуқуқли овоз бериш имконияти яратилди. Натижада, касаба уюшмасининг янги раҳбарияти тасдиқланди ҳамда келгуси йиллар учун аниқ вазифалар белгиланди.
Йиғилиш якунида иштирокчилар келгуси даврда жамоа шартномасини янада такомиллаштириш, ўқитувчиларнинг ижтимоий-иқтисодий ҳимоясини кучайтириш ва касаба уюшмаси фаолиятини янада самарали ташкил этиш бўйича ўз таклиф ва тавсияларини билдирдилар. Йиғилиш конструктив муҳокамалар ва келгуси фаолият учун муҳим қарорлар қабул қилиниши билан якунланди.
М.Даулбаев,
Ўзбекистон таълим ва фан ходимлари касаба уюшмаси Нукус шаҳар бўлинмаси кенгаши раиси
