«O‘zbekiston kasaba uyushmalari harakatining 120 yilligi»ga bag‘ishlab o’tkazilayotgan tanlovlar to’g’risida
O‘zbekiston ta’lim va fan xodimlari kasaba uyushmasi Guliston shahar bo’linmasi kengashi tomonidan 2025-yil 28-mart kuni «O‘zbekiston kasaba uyushmalari harakatining 120 yilligi»ga bag‘ishlab «Kasaba uyushmalari kecha, bugun va ertaga» esselar tanlovi hamda «Kasaba uyushmalari mening nigohimda» videoroliklar tanlovi o‘tkazildi. Mazkur tanlovlar kasaba uyushmalarining jamiyat taraqqiyotidagi ahamiyatini, ularning o‘tmishi, bugungi kuni va kelajakdagi istiqbollari haqida keng jamoatchilikka yetkazish maqsadida tashkil etildi.
Tanlovda kasaba uyushmasiga a’zo bo‘lgan tarmoq tizimidagi barcha ta’lim muassasalari faol ishtirok etishdi. Ular o‘z ijodiy ishlari orqali kasaba uyushmalarining ta’lim sohasidagi o‘rni, xodimlarning huquqlarini himoya qilishdagi sa’y-harakatlari hamda ushbu tashkilotlarning jamiyatga ta’sirini yorqin yoritishga harakat qilishdi.
Yakuniy natijalarga ko‘ra, «Kasaba uyushmalari kecha, bugun va ertaga» esselar tanlovida 10-umumiy o‘rta ta’lim maktabi o‘qituvchisi Yusupova Sevara birinchi o‘rinni egalladi. Uning ijodiy ishi kasaba uyushmalarining tarixiy rivojlanish bosqichlarini hamda zamonaviy jamiyatdagi roli haqida batafsil va chuqur yondashuv bilan yozilgani bilan ajralib turdi.
Shuningdek, «Kasaba uyushmalari mening nigohimda» videoroliklar tanlovida Guliston shahridagi Prezident maktabining faol xodimi Xujamuratov Odil g‘olib deb topildi. Uning videorolikda kasaba uyushmalarining zamonaviy yoshlar hayotidagi o‘rni, ta’lim tizimidagi ahamiyati va kelajakda bu tizimni yanada rivojlantirish bo‘yicha fikrlari estetik jihatdan puxta yondashuv bilan ifodalangan edi.
Tanlovda faxrli 1-, 2-, va 3-o‘rinlarni qo‘lga kiritgan g‘oliblar Guliston shahar bo‘linmasi kengashi tomonidan esdalik sovg‘alari bilan taqdirlandilar. Shu bilan birga, 1-o‘rin sohiblariga viloyat bosqichida ishtirok etish huquqi berildi.
Ushbu tanlov ta’lim sohasida faoliyat yuritayotgan kasaba uyushmasi a’zolari uchun katta motivatsiya bo‘lishi bilan birga, kasaba uyushmalarining ahamiyatini yanada oshirishga xizmat qiladi. Kelgusida bunday tadbirlarni muntazam o‘tkazish orqali xodimlarning huquqiy ongi va kasaba uyushmalarining jamiyat hayotidagi o‘rnini mustahkamlash rejalashtirilgan.
O‘zbekiston ta’lim va fan xodimlari kasaba uyushmasi Guliston shahar bo’linmasi kengashi
