«Ўзбекистон касаба уюшмалари ҳаракатининг 120 йиллиги»га бағишлаб ўтказилаётган танловлар давоми тўғрисида
Ўзбекистон таълим ва фан ходимлари касаба уюшмаси Қизилтепа туман бўлинмаси кенгаши томонидан “Ўзбекистон касаба уюшмалари ҳаракатининг 120 йиллик байрами”га бағишлаб Ўзбекистон таълим ва фан ходимлари касаба уюшмаси Республика кенгашининг соврини учун “Касаба уюшмалари кеча, бугун ва эртага” эсселар ҳамда “Касаба уюшмалари менинг ҳаётимда” ижтимоий роликлар кўрик танловларининг туман босқичи бўлиб ўтди.
Танловда иштирок этган ўқитувчилар ва таълим соҳаси ходимлари ўз ижодий ишларида касаба уюшмаларининг ўтмишдаги фаолияти, бугунги кундаги аҳамияти ва келажакдаги истиқболлари ҳақида ёзишди. Шунингдек, ижтимоий роликларда касаба уюшмаларининг жамиятда тутган ўрни, уларнинг ходимлар манфаатларини ҳимоя қилишдаги роли ва меҳнаткашларнинг ҳаётидаги аҳамияти акс эттирилди.
Танлов жараёнини шаффоф ва адолатли ўтказиш мақсадида фаолиятни баҳолаш бўйича комиссия таркибига мутахассислар жалб қилинди. Улар иштирокчиларнинг ишларини турли мезонлар асосида таҳлил қилиб, ижодий ёндашув, мавзудан чуқур фойдаланиш, ижтимоий аҳамиятли ғояларни илгари суриш ва техник ижрога алоҳида эътибор қаратдилар.
Натижада, кўрик-танловнинг туман босқичида 39-мактаб ўқитувчиси Л.Назарова томонидан ёзилган эссе юқори баҳоланиб, Вилоят босқичига йўлланма олди. Шунингдек, юқори ижодий маҳорати ва фикрларининг чуқурлиги билан ажралиб турган иштирокчилардан 1-, 2- ва 3-ўринни эгаллаган ғолиблар аниқланди ва Туман кенгаши томонидан муносиб равишда рағбатлантирилди.
Танлов жараёнида иштирокчиларнинг фаоллиги, касаба уюшмаларининг меҳнаткашлар ҳаётида тутган ўрни ҳақидаги чуқур фикрлари ва ижтимоий муаммоларга нисбатан фаол муносабати яна бир бор тасдиқланди. Бу каби танловлар соҳада фаолият юритаётган ходимларнинг ижодий салоҳиятини юксалтириш, уларнинг ҳуқуқий онгини ошириш ва касаба уюшмаларининг аҳамиятини кенг жамоатчиликка етказишда муҳим аҳамият касб этади.
Ўзбекистон таълим ва фан ходимлари касаба уюшмаси Қизилтепа туман бўлинмаси кенгаши
