Chirchiq davlat pedagogika universiteti Kasaba uyushmasi qo‘mitasining 2020-2025 yillardagi faoliyati bo‘yicha hisobot konferensiyasi bo‘lib o‘tdi
Chirchiq davlat pedagogika universitetida kasaba uyushmasi qo‘mitasining 2020-2025-yillardagi faoliyati bo‘yicha hisobot konferensiyasi bo‘lib o‘tdi. Konferensiyada O‘zbekiston ta’lim va fan xodimlari kasaba uyushmasi Respublika kengashining Toshkent viloyati bo‘yicha mas’ul tashkilotchisi Ravshanoy Gaziyeva va Chirchiq davlat pedagogika universiteti rahbariyati hamda kasaba uyushmasi a’zolari qatnashdi. Tadbirda kasaba uyushmasi faoliyatining barcha ustuvor yo‘nalishlari tahlil qilindi, jamoa shartnomasining ijrosi va kasaba uyushmasi faoliyatining samaradorligi haqida muhokamalar o‘tkazildi.
Konferensiya jarayonida dastlab universitet kasaba uyushmasi qo‘mitasi raisi B. Bekmatovning 2020-2025 yillardagi faoliyati bo‘yicha hisoboti tinglandi. Unda universitetda o‘qituvchilar va xodimlarning huquqlarini himoya qilish, ish sharoitlarini yaxshilash, ijtimoiy sohalarda amalga oshirilgan islohotlar va kasaba uyushmasining jamoa shartnomasi bo‘yicha bajarilgan vazifalari haqida ma’lumot berildi. U shuningdek, universitetda kasaba uyushmasi a’zolari uchun ko‘plab ijtimoiy va madaniy tadbirlar, ta’lim va kasbiy mahoratni oshirishga qaratilgan loyihalar amalga oshirilganini ta’kidladi.
Konferensiyada O‘zbekiston ta’lim va fan xodimlari kasaba uyushmasi Respublika kengashining Toshkent viloyati bo‘yicha mas’ul tashkilotchisi Ravshanoy Gaziyeva so‘zga chiqib, kasaba uyushmasi faoliyatini yuqori baholab, uning jamoaviy shartnomalar bo‘yicha amalga oshirgan ishlarini ijobiy baholadi. Ularning fikricha, kasaba uyushmasi qo‘mitasi xodimlar manfaatlarini himoya qilish, ish o‘rinlarida xavfsizlikni ta’minlash va ta’lim jarayoni sifatini oshirish bo‘yicha ko‘plab samarali chora-tadbirlarni amalga oshirganini ta’kidladi.
Konferensiya yakunida delegatlar ochiq ovoz berish yo‘li bilan 5 yil muddatga kasaba uyushmasi qo‘mitasi raisi lavozimiga B. Bekmatovni sayladi. Chirchiq davlat pedagogika universiteti kasaba uyushmasi qo‘mitasining 2020-2025 yillardagi faoliyati bo‘yicha hisobot konferensiyasining o‘tkazilishi universitet jamoasining birlashgan va mustahkam ish olib borayotganidan dalolat beradi.
R. Gaziyeva,
O‘zbekiston ta’lim va fan xodimlari kasaba uyushmasi Respublika kengashining Toshkent viloyati bo‘yicha mas’ul tashkilotchisi
