Наманганлик Таълим ва фан фидоийлари Бухоро ва Самарқанд сари саёҳатда
Ўзбекистон таълим ва фан ходимлари касаба уюшмаси Наманган шаҳар бўлинмаси кенгаши томонидан «Касаба уюшмаларининг 120 йиллиги» муносабати билан ўтказилаётган “Таълим ва фан ходимлари касаба уюшмаси хафталиги” давомида 41 нафар касаба уюшма фаоллари, ёшлари ва меҳнат фахрийларидан иборат бир гуруҳини “Янги Ўзбекистон бўйлаб саёҳат қил” шиори остида 2025 йил 22–26 апрел кунлари қадимий ва тарихий, навқирон Бухоро ва Самарқанд шаҳарларига уюштирилган саёҳатлари давом этмоқда.
Ушбу ташаббус нафақат касаба уюшмаси аъзоларини рағбатлантириш, балки уларни юртимизнинг бой тарихи, маданий мероси ва қадимий шаҳарларимизда кечаётган замонавий ислоҳотлар билан яқиндан таништириш мақсадида ҳам амалга оширилмоқда.
Бухоро ва Самарқанд — нафақат Марказий Осиёнинг, балки жаҳон тамаддунининг муҳим марказларидан бири сифатида алоҳида ўрин тутади. Саёҳат давомида иштирокчилар Имом Бухорий мажмуаси, Регистон майдони, Шоҳи Зинда мажмуаси, Калон минораси, Мир Араб мадрасаси, Лаби Ҳовуз, Арк қасри, Ситораи Моҳи Хоса каби кўплаб тарихий обидаларга ташриф буюришди. Улар нафақат бу зиёратгоҳлар ва ёдгорликларни томоша қилишди, балки тарихий руҳни жонли ҳис этиш имконига ҳам эга бўлишди.
Саёҳат чоғида меҳмонлар учун маданий дастурлар, маҳаллий ҳунармандлар билан учрашувлар, миллий таомлар билан зиёфатлар ҳам ташкил этилди. Бу эса иштирокчиларнинг кайфиятини янада кўтариб, уларнинг таассуротларини бойитди.
Наманганлик таълим ва фан ходимлари бундай ташаббусларни юқори баҳолаб, бу саёҳат уларга фақат дам олиш эмас, балки руҳий озуқа, илҳом ва ижодий кайфият бағишлаганини таъкидлашди. Саёҳат иштирокчилари “Янги Ўзбекистон” сўзининг мазмунини янада чуқур англаб, мамлакатимизда амалга оширилаётган кенг кўламли ислоҳотларни ўз кўзлари билан кўриш имкониятига эга бўлишди.
Шу тариқа, «Таълим ва фан ходимлари касаба уюшмаси хафталиги» доирасидаги мазкур саёҳат нафақат ўтган 120 йиллик тарихга муносиб эҳтиром, балки юртимиз келажагини бунёд этаётган фидоийларга кўрсатилаётган эътибор ва ғамхўрлик намунаси бўлди.
Ўзбекистон таълим ва фан ходимлари касаба уюшмаси Наманган шаҳар бўлинмаси кенгаши
