Бекободда таълим ва фан ходимлари касаба уюшмасининг ҳисобот-сайлов конференцияси: Янгиланган ишонч ва келгуси вазифалар

Таълим ва фан ходимлари касаба уюшмаси Бекобод шаҳар ташкилотининг I- ҳисобот-сайлов Конференцияси бўлиб ўтди. Ушбу анжуман ўтган беш йиллик фаолиятни сарҳисоб қилиш, эришилган ютуқларни мустаҳкамлаш ва келгусидаги устувор вазифаларни белгилаб олиш мақсадида ташкил этилди.

Конференция ишида Ўзбекистон касаба уюшмалари Федерацияси Тошкент вилояти кенгаши молия бўлими мутахассиси Х.Ханнаев, таълим ва фан ходимлари касаба уюшмаси Бўка ҳудуди раҳбари Ф. Нурматов, Бекобод шаҳар «Bekobod yangiliklari» газетаси таҳририятидан М. Ҳожимуродова каби меҳмонлар, шунингдек, бошланғич касаба уюшма ташкилотларидан сайланган делегатлар, касаба уюшмаси фаоллари ва иш берувчиларнинг вакиллари иштирок этишди. Оммавий ахборот воситалари вакилининг иштироки тадбирнинг очиқ ва шаффоф руҳда ўтганидан далолат берди.

Конференция кун тартибига мувофиқ, дастлаб шаҳар бўлинмаси Кенгашининг ўтган беш йиллик фаолияти тўғрисидаги ҳисоботи тингланди. Ҳисоботда ходимларнинг ижтимоий-иқтисодий ҳуқуқ ва манфаатларини ҳимоя қилиш, меҳнат муҳофазаси, соғломлаштириш тадбирлари ва бошқа йўналишларда амалга оширилган ишлар батафсил таҳлил қилинди. Муҳокамалар ва савол-жавоблардан сўнг, шаҳар бўлинмаси Кенгашининг фаолияти қониқарли деб баҳоланди. Шунингдек, шаҳар бўлинмасининг Тафтиш комиссияси ҳисоботи ҳам эшитилиб, бир овоздан тасдиқланди. Конференция иштирокчилари томонидан билдирилган таклиф ва мулоҳазалар инобатга олиниб, келгусидаги фаолият юзасидан тегишли қарорлар қабул қилинди.

Анжуманнинг энг муҳим қисмларидан бири ташкилий масалалар бўлди. Делегатларнинг ёпиқ овоз бериш натижаларига кўра, кўпчиликнинг юқори овози ва ишончи билан Маматов Мамуржон Максудович шаҳар бўлинмаси Кенгаши раислигига қайта сайланди. Бу, шубҳасиз, унинг ўтган даврдаги самарали меҳнатига берилган юксак баҳодир. Шу билан бирга, 19 нафар вакилдан иборат шаҳар бўлинмаси Кенгашининг янги таркиби ҳамда 3 кишидан иборат Тафтиш комиссияси раиси ва аъзолари сайланди. Шаҳар бўлинмаси Кенгаши раиси Маматов Мамуржон ва Бекобод шаҳар политехникуми бошланғич ташкилоти раиси Ф.Кенжаев Таълим ва фан ходимлари касаба уюшмаси Тошкент вилояти Конференциясига делегат этиб сайландилар.

Конференциядан сўнг Таълим ва фан ходимлари касаба уюшмаси Бекобод шаҳар бўлинмаси Кенгашининг 1-Пленуми ўтказилди. Унда шаҳар бўлинмаси Кенгаши раисининг жамоатчилик асосидаги ўринбосари ва Ижроия қўмита аъзолари сайлаб олинди.

Тадбир сўнгида касаба уюшмасининг бир гуруҳ фаол аъзолари ва кўп йиллик меҳнати билан соҳа ривожига ҳисса қўшган фахрий устозларга шаҳар бўлинмаси Кенгашининг ташаккурномалари ва эсдалик совғалари тантанали равишда топширилди.

Ўтказилган ушбу ҳисобот-сайлов конференцияси Бекобод шаҳри таълим ва фан ходимлари касаба уюшмаси фаолиятида янги саҳифа очди. Янгиланган таркиб ва қайта сайланган раҳбарият зиммасига соҳа ходимларининг манфаатларини янада самарали ҳимоя қилишдек масъулиятли вазифалар юклатилди.

Таълим ва фан ходимлари касаба уюшмаси Бекобод шаҳар бўлинмаси кенгаши