Яккабоғ тумани таълим ва фан ходимлари касаба уюшмаси: Янги раис, янги уфқлар
Қашқадарё вилоятининг Яккабоғ туманида таълим соҳаси ходимлари учун муҳим аҳамиятга эга тадбир – Ўзбекистон таълим ва фан ходимлари касаба уюшмаси туман бўлинмаси кенгашининг навбатдаги конференцияси бўлиб ўтди. Анжуман соҳа ходимларининг ижтимоий-меҳнат ҳуқуқларини ҳимоя қилиш борасида ўтган беш йиллик фаолиятни таҳлил қилиш ва келгуси давр учун раҳбар органларни сайлаш мақсадида чақирилди.
Конференция ишига юқоридан масъул вакиллар ташриф буюриб, унинг аҳамиятини янада оширдилар. Жумладан, Ўзбекистон таълим ва фан ходимлари касаба уюшмаси Республика кенгашининг бош юристконсульти Муҳамедалиева Дилбар Абдураҳмоновна ва Республика кенгашининг Қашқадарё вилояти бўйича масъул ташкилотчиси Кубаев Шодмон Раббимович иштирок этиб, ўз фикр-мулоҳазалари билан ўртоқлашдилар.
Конференция кун тартибидаги асосий масала – Ўзбекистон таълим ва фан ходимлари касаба уюшмаси Яккабоғ туман бўлинмаси кенгашининг 2020-2025 йилларда амалга оширган ишлари тўғрисидаги ҳисоботи бўлди. Шунингдек, тафтиш комиссиясининг ҳам 5 йиллик ҳисоботи тингланди. Ҳисоботларда ўтган давр мобайнида эришилган ютуқлар, йўл қўйилган камчиликлар ва уларни бартараф этиш йўллари, ходимларнинг мурожаатлари билан ишлаш, ижтимоий шерикликни ривожлантириш каби масалалар қамраб олинди. Делегатлар томонидан берилган баҳога кўра, ҳар иккала ҳисобот ҳам қониқарли деб топилди.
Шундан сўнг, кун тартибидаги ташкилий масалага ўтилди. Туман бўлинмаси кенгаши раислигига сайловлар демократик тамойиллар асосида, яъни ёпиқ яширин овоз бериш йўли билан ўтказилди. Саноқ комиссиясининг қарорига кўра, делегатларнинг якдил қўллаб-қувватлаши билан Хонназаров Алишер Махмудович бир овоздан туман бўлинмасининг кенгаши раислигига сайланди. Бу юксак ишонч янги раис зиммасига катта масъулият юклайди.
Шунингдек, конференцияда туман бўлинмаси кенгашининг янги таркиби, тафтиш комиссияси аъзолари ҳамда ижроия қўмита аъзолари ҳам сайланди. Ўзбекистон таълим ва фан ходимлари касаба уюшмаси Қашқадарё вилоят ташкилотининг бўлажак конференциясига иштирок этувчи делегатлар ҳам сайлаб олинди.
Конференция кўтаринки кайфиятда, ўзаро фикр алмашиш ва қизғин муҳокамалар руҳида ўтди. Бу Яккабоғ тумани таълим ва фан ходимларининг ўз касаба уюшмаси фаолиятига бефарқ эмаслигини, соҳа ривожи ва ходимлар манфаатлари йўлида бирдамликка тайёр эканликларини кўрсатди. Янги сайланган раҳбарият ва кенгаш аъзолари олдида эндиликда белгиланган вазифаларни сидқидилдан бажариш, ходимлар ишончини оқлаш вазифаси турибди.
Ш. Кубаев,
Ўзбекистон таълим ва фан ходимлари касаба уюшмаси Республика кенгашининг Қашқадарё вилояти бўйича масъул ташкилотчиси
