Шерободда таълим ходимлари касаба уюшмасининг ҳисобот-сайлов конференцияси: Ишонч ва янги вазифалар

Сурхондарё вилоятининг Шеробод туманидаги 1-сонли умумий ўрта таълим мактабининг мажлислар залида муҳим тадбир – Ўзбекистон таълим ва фан ходимлари касаба уюшмаси Шеробод туман бўлинмасининг I-ҳисобот-сайлов Конференцияси бўлиб ўтди. Анжуман туман таълим ва фан соҳаси ходимларининг ижтимоий-иқтисодий манфаатларини ҳимоя қилиш борасидаги ўтган беш йиллик фаолиятни сарҳисоб қилиш ва келгуси режаларни белгилаб олиш мақсадида ташкил этилди.

Конференция кун тартибига бир қатор муҳим масалалар киритилган бўлиб, улар орасида Ўзбекистон таълим ва фан ходимлари касаба уюшмаси Шеробод туман бўлинмаси кенгашининг 2020 йил май ойидан 2025 йил май ойигача бўлган даврдаги фаолияти ҳамда тафтиш комиссиясининг ҳисоботларини тинглаш ва муҳокама қилиш асосий ўринни эгаллади. Шунингдек, Шеробод туман бўлинмаси кенгаши раисини сайлаш, туман бўлинмаси Кенгаши аъзоларини, тафтиш комиссияси аъзолари ва раисини ҳамда Ўзбекистон таълим ва фан ходимлари касаба уюшмаси Сурхондарё вилояти Конференциясига делегатлар сайлаш масалалари ҳам кўриб чиқилди.

Делегатлар томонидан кун тартибидаги барча масалалар атрофлича, очиқ ва конструктив руҳда муҳокама этилди. Ўтган давр мобайнида эришилган ютуқлар эътироф этилиб, келгусидаги фаолиятни янада такомиллаштириш бўйича таклиф ва мулоҳазалар билдирилди.

Конференциянинг энг муҳим қисми – раҳбар органларга сайловлар бўлди. Сайлов натижаларига кўра, делегатларнинг якдил қўллаб-қувватлаши билан Бойқулов Шермамат Мамараимович Ўзбекистон таълим ва фан ходимлари касаба уюшмаси Шеробод туман бўлинмаси кенгаши раиси лавозимига яна бир бор сайланди. Бу юксак ишонч Ш.Бойқуловнинг ўтган даврдаги самарали фаолиятига берилган муносиб баҳо бўлди. Шунингдек, Кенгаш ва тафтиш комиссиясининг янги таркиблари ҳам шакллантирилиб, вилоят конференциясига делегатлар сайланди.

Ушбу ҳисобот-сайлов конференцияси Шеробод тумани таълим ва фан ходимлари касаба уюшмаси фаолиятида янги босқични бошлаб берди. Янгиланган Кенгаш ва қайта сайланган раис бошчилигида касаба уюшмаси бўлинмаси ўз аъзоларининг ҳуқуқ ва манфаатларини ҳимоя қилиш, улар учун муносиб меҳнат шароитларини яратиш йўлидаги эзгу ишларни давом эттиришга қатъий бел боғлаган.

збекистон таълим ва фан ходимлари касаба уюшмаси Шеробод туман бўлинмаси кенгаши