Соғлом ходим – соғлом авлод тарбиячиси: Ромитанда тарбиячилар спортда беллашди

Таълим ва фан ходимлари касаба уюшмаси Ромитан туман бўлинмаси кенгаши томонидан тумандаги мактабгача таълим ташкилотлари ходимлари ўртасида спорт мусобақалари ташкил этилди.

Кундалик иш фаолиятида бор меҳри ва вақтини кичкинтойларнинг таълим-тарбиясига бағишлайдиган тарбиячи ва муассаса ходимлари бу сафар спорт майдонида ўзларининг чаққонлиги ва маҳоратларини намойиш этдилар. Мусобақа дўстона рақобат ва жамоавий ҳамжиҳатлик руҳида ўтди.

Бу каби спорт тадбирлари ходимларнинг саломатлигини мустаҳкамлаш, уларнинг иш фаолиятига ижобий руҳият бағишлаш ҳамда жамоада соғлом ва аҳил муҳитни шакллантиришга хизмат қилади.

Қизғин беллашувлар якунида ғолиб ва совриндорлар касаба уюшмасининг туман бўлинмаси томонидан диплом ва эсдалик совғалари билан тақдирландилар. Бироқ, таъкидланганидек, мусобақадаги энг катта ютуқ — бу соғлом турмуш тарзини тарғиб қилиш, янги дўстликлар ва ижобий ҳис-туйғулар бўлди.

Ромитандаги ушбу спорт тадбири яна бир бор шуни кўрсатдики, соғлом ходим — бу, аввало, соғлом авлод тарбиячиси демакдир.

Ўзбекистон таълим ва фан ходимлари касаба уюшмаси Ромитан туман бўлинмаси кенгаши