Нукусда касаба уюшмаларининг 120 йиллиги кенг нишонланди: Маърифий тадбирлар ва авлодлар учрашуви
Ўзбекистон касаба уюшмалари ҳаракати ўзининг шонли 120 йиллик юбилейини нишонламоқда. Ушбу муҳим сана муносабати билан Ўзбекистон таълим ва фан ходимлари касаба уюшмаси Нукус шаҳар бўлинмаси томонидан таълим муассасаларида қатор маънавий-маърифий тадбирлар ўтказилмоқда.
Қонун устуворлиги ва меҳнат муҳофазаси
Жорий йилнинг 10 октябрь куни Нукус шаҳридаги 5-сонли умумий ўрта таълим мактабида касаба уюшмаси ташаббуси билан “маънавият дарси” ташкил этилди. Унда мактаб ўқитувчилари ва ишчи-ходимлари иштирок этдилар.
Тадбирнинг асосий мақсади – ходимларга Ўзбекистон касаба уюшмаларининг 120 йиллик тарихи, шунингдек, “Касаба уюшмалари тўғрисида”ги, “Педагогнинг мақоми тўғрисида”ги қонунлар ва янги Меҳнат кодексининг мазмун-моҳиятини чуқур тушунтиришдан иборат бўлди.
Семинарда сўз олганлар ходимлар учун муносиб меҳнат шароитларини яратиш, уларнинг ижтимоий ҳимоясини таъминлаш борасида касаба уюшмаларининг тутган ўрни, бугунги кунда соҳа ходимларига яратилаётган имконият ва қулайликлар хусусида атрофлича тўхталиб ўтдилар. Шунингдек, мактабнинг ҳуқуқшунослик асослари фани ўқитувчиси М.Рзамуратова томонидан Меҳнат кодексига киритилган сўнгги ўзгартириш ва қўшимчалар бўйича батафсил маълумот берилди.
Иштирокчиларга касаба уюшмалари тарихига оид тарихий манбалар асосида тайёрланган тарқатма материаллар тақдим этилди. Қизғин савол-жавоблар ва мулоқотларга бой ўтган тадбир барчада катта таассурот қолдирди. Таъкидланганидек, бу каби учрашувлар шаҳардаги бошқа таълим муассасаларида ҳам режа асосида давом эттирилади.
Тажриба ва ёшлик уйғунлиги: “Уч авлод” учрашуви
Шу куннинг ўзида Нукус шаҳридаги 42-сонли умумий ўрта таълим мактабида “Уч авлод учрашуви” номли самимий ва дилдан суҳбат ташкил этилди.
Унда узоқ йиллар давомида ушбу мактабда самарали меҳнат қилиб, бугун кексалик гаштини сураётган меҳнат фахрийлари Б.Самахова, К.Худойбергенова, Ж.Сейтмуратова, бугунги кунда ёшларга таълим-тарбия бераётган тажрибали устозлар А.Уббиниёзов, Н.Мамбетова ҳамда уларнинг ёш шогирдлари иштирок этдилар.
Тадбир давомида нуроний устозлар ўзларининг бой ҳаётий тажрибалари, ўтмишдаги ёрқин хотиралари билан ўртоқлашдилар. Улар бугунги таълим соҳасидаги ислоҳотларни юқори баҳолаб, яратилган имкониятлардан унумли фойдаланиб, ёш авлодни комил инсонлар этиб тарбиялаш йўлида фаолият кўрсатаётган педагогларга муваффақиятлар тиладилар.
Ўз навбатида, мактаб жамоаси фахрий устозларга доимо маслаҳатгўй ва йўлбошчи бўлиб юришларини тилаб, уларга чуқур ҳурмат ва эҳтиромларини билдирдилар. Мазмунли ва қизиқарли суҳбатларга бой бўлган учрашув барча иштирокчилар қалбида унутилмас из қолдирди.
Ўзбекистон таълим ва фан ходимлари касаба уюшмаси Нукус шаҳар бўлинмаси кенгаши
