Манфаатлар ҳимояси ва барқарор ривожланиш: «Ижтимоий фикр» ЖФЎМда муҳим йиғилиш
Бугун «Ижтимоий фикр» жамоат фикрини ўрганиш марказида ташкилотнинг ички ижтимоий муҳитини мустаҳкамлаш ва ходимларнинг ҳуқуқий манфаатларини ҳимоя қилишга қаратилган муҳим тадбир бўлиб ўтди. Йиғилиш кун тартибидан 2024-2026 йилларга мўлжалланган Жамоа шартномасининг (ЖШ) 2025 йил давомида ижро этилиши ҳолатини муҳокама қилиш ўрин олди.
Тантанали ва ишчан руҳда ўтган тадбирда иш берувчи ҳамда ходимлар манфаатларини ифода этувчи касаба уюшмаси вакиллари иштирок этди. Йиғилиш давомида томонларнинг ўтган давр мобайнида ҳамкорликда амалга оширган ишлари юзасидан ҳисоботлари тингланди.
Комиссия хулосаси ва эришилган натижалар Тадбирда махсус тузилган «Далолатнома» комиссиясининг ахбороти батафсил кўриб чиқилди. Комиссия аъзолари Жамоа шартномасида белгиланган бандларнинг ҳаётга татбиқ этилиши, хусусан, меҳнат шароитларини яхшилаш, ижтимоий имтиёзлар ва ходимларни моддий-маънавий рағбатлантириш масалалари юқори даражада бажарилганини эътироф этдилар. Муҳокамалар якунида комиссия ахбороти бир овоздан маъқулланди.
Келажакка назар: 2026 йил учун янги ташаббуслар Йиғилиш нафақат сарҳисоб, балки истиқболдаги режаларни белгилаб олиш майдонига ҳам айланди. Иштирокчилар томонидан давр талаби ва ижтимоий ислоҳотлардан келиб чиққан ҳолда, 2026 йил учун мўлжалланган режаларга бир қатор муҳим қўшимчалар киритиш юзасидан таклифлар билдирилди. Бу таклифлар асосан ходимларнинг саломатлигини муҳофаза қилиш, малака ошириш тизимини такомиллаштириш ва ижтимоий ҳимоя пакетларини янада кенгайтиришга қаратилган.
Тадбир якунида Жамоа шартномасининг ҳар бир банди ходимлар фаровонлиги ва ташкилот ривожи учун хизмат қилиши лозимлиги алоҳида таъкидланди.
Ўзбекистон Фанлар академияси бирлашган касаба уюшмаси қўмитаси
