Урганчда ижтимоий шериклик: Академик лицейда жамоа шартномаси ижроси муҳокама қилинди

Урганч шаҳрида таълим соҳаси ходимларининг ҳуқуқий ва ижтимоий манфаатларини таъминлашга қаратилган муҳим тадбир бўлиб ўтди. Урганч давлат педагогика институти академик лицейида иш берувчи ва меҳнат жамоаси ўртасидаги ҳамкорлик натижалари сарҳисоб қилинди.

2026 йилнинг 26 март куни Урганч давлат педагогика институти академик лицейида меҳнат жамоасининг умумий ҳисобот йиғилиши юқори савияда ўтказилди. Тадбирнинг асосий кун тартибидан муассасада 2024–2026 йилларга мўлжалланган жамоа шартномасининг 2025 йилдаги ижросини таҳлил қилиш ҳамда жорий 2026 йил учун ушбу муҳим ҳужжатга тегишли қўшимча ва ўзгартиришлар киритиш масалалари ўрин олди.

Йиғилиш давомида жамоа шартномасининг ўтган йилги ижро ҳолати юзасидан академик лицей директори ҳамда бошланғич касаба уюшмаси қўмитаси раисининг батафсил ҳисоботлари тингланди. Маърузачилар ходимларни ижтимоий-иқтисодий қўллаб-қувватлаш, улар учун муносиб ва хавфсиз меҳнат шароитларини яратиш, шунингдек, ўқитувчи ва ишчи-ходимларнинг ҳуқуқий ҳимоясини таъминлаш борасида амалга оширилган ишларга атрофлича тўхталиб ўтдилар.

Ҳисоботлар ва билдирилган фикр-мулоҳазалар муҳокамасидан сўнг, жамоа шартномасининг 2025 йилдаги бажарилишини назорат қилувчи комиссия томонидан тузилган далолатнома иштирокчилар томонидан тасдиқланди. Амалга оширилган ишлар кўлами ва эришилган ижобий натижалар инобатга олиниб, ҳужжатнинг ўтган йилги ижроси меҳнат жамоаси томонидан бир овоздан «қониқарли» деб топилди.

Тадбирнинг мантиқий давоми сифатида, давр талаблари, меҳнат қонунчилигидаги янгиликлар ва жамоа аъзоларининг таклифлари асосида амалдаги жамоа шартномасига 2026 йил учун бир қатор муҳим қўшимчалар киритилди. Қабул қилинган мазкур ўзгаришлар келгусида лицей фидойиларининг ижтимоий кафолатларини янада кенгайтириш ва меҳнат унумдорлигини оширишга хизмат қилиши шубҳасиздир.