Тарихий шаҳарга саёҳат: Ғиждувонлик устозлар Самарқанднинг қадимий қадамжоларини зиёрат қилишди
Буюк Ипак йўлининг гавҳари бўлмиш азим Самарқанд шаҳри ўзининг бетакрор обидалари ва бой тарихи билан юртдошларимизни ўзига оҳанграбодек жалб этиб келмоқда. Баҳорнинг илиқ кунларида ғиждувонлик таълим фидойилари учун ушбу кўҳна шаҳарга уюштирилган сафар уларнинг қалбида унутилмас таассуротлар қолдирди.
Ўзбекистон Республикаси Президентининг ПФ-257-сонли Фармони ижросини таъминлаш ҳамда «Ўзбекистон бўйлаб саёҳат қил!» умуммиллий дастури доирасида мамлакатимизда ички туризмни ривожлантириш ва кенг оммани юртимизнинг шонли тарихи билан яқиндан таништириш мақсадида тизимли ишлар амалга оширилмоқда. Хусусан, жорий йилнинг 25-26 март кунлари Ўзбекистон таълим ва фан ходимлари касаба уюшмаси Ғиждувон туман бўлинмаси кенгаши ташаббуси билан туманда фаолият юритаётган устоз ва мураббийлар учун Самарқанд шаҳрига икки кунлик маданий-маърифий саёҳат ташкил этилди.
Мазкур тадбир таълим соҳаси заҳматкашларининг кундалик иш жараёнларидан сўнг мазмунли ҳордиқ чиқаришлари учун ажойиб имконият бўлди. Икки кунлик сафар давомида иштирокчилар Самарқанд шаҳрининг бетакрор манзараларидан баҳраманд бўлиб, асрлар синовидан ўтган қадимий қадамжолар, муқаддас зиёратгоҳлар ва маҳобатли тарихий обидаларни зиёрат қилишди.
Таъкидлаш жоизки, бундай саёҳатлар нафақат ходимларнинг руҳий тетикланиши ва саломатлигини мустаҳкамлашга хизмат қилади, балки жамоавий ҳамжиҳатликни ошириш, касбдошларнинг бир-бирларини янада яқиндан билиб олишлари ва дўстона муҳитни шакллантириш учун ҳам самарали платформа вазифасини ўтайди. Самарқанднинг сеҳрли тарихи билан юзма-юз келган устозлар ўз манзилларига катта руҳий қувват ва янгича шижоат билан қайтдилар.
