Соғлом танда — сифатли таълим: Фарғоналик педагоглар спорт майдонларида беллашдилар.
Таълим тизимида фаолият юритаётган ходимларни соғлом турмуш тарзига тарғиб қилиш, улар ўртасида дўстона муҳитни мустаҳкамлаш мақсадида тизимли ишлар амалга оширилмоқда. Хусусан, 2026 йил 21 апрель куни сўлим «Аҳмад ал-Фарғоний» санаторийси спорт байрамига мезбонлик қилди.
Давлатимиз раҳбари томонидан илгари сурилган «5 муҳим ташаббус» ижроси доирасида ташкил этилган ушбу тадбир «Соғлом танда — сифатли таълим» шиори остида ўтказилди.
Спорт мусобақаларининг шаҳар босқичида Фарғона шаҳридаги умумтаълим мактабларида фаолият юритаётган 120 нафардан ортиқ ишчи-ходимлар иштирок этдилар. Педагоглар кундалик иш тартибидан бироз чекиниб, волейбол, стол тенниси, шахмат-шашка ва енгил атлетика каби спорт турлари бўйича ўз маҳоратларини намойиш этдилар.
Мусобақа нафақат жисмоний чиниқиш, балки таълим соҳаси вакиллари ўртасида ўзаро тажриба алмашиш ва жамоавий жипсликни ошириш майдонига айланди.
Қизғин ва муросасиз кечган баҳслар якунида ҳакамлар томонидан энг чаққон, эпчил ва маҳоратли иштирокчилар аниқланди. Тадбирнинг тантанали қисмида ғолиб ва совриндорлар ташкилотчилар томонидан:
- Махсус дипломлар;
- Қимматбаҳо эсдалик совғалари билан тақдирландилар.
«Аҳмад ал-Фарғоний» санаторийсининг мусаффо ҳавоси ва байрамона безатилган майдонлари тадбирга ўзгача файз бағишлади. Иштирокчиларнинг таъкидлашича, бу каби спорт ўйинлари устозларнинг иш қобилиятини оширишга ва руҳий тетикликни таъминлашга хизмат қилади.
Зеро, жисмонан соғлом ва маънан тетик устозгина ёш авлодга сифатли таълим ва намунали тарбия беришга қодирдир. Спорт байрами барча иштирокчиларда бир олам ижобий таассуротлар қолдирди.
