Нурободда «Соғлом танда – сифатли таълим» спорт мусобақаларининг туман босқичи юқори савияда якунланди

Нуробод туманида таълим муассасалари ходимлари ўртасида Касаба уюшмаси кубоги учун оммавий спорт мусобақалари бўлиб ўтди. Қизғин ва муросасиз баҳслар якунида ғолиблар аниқланиб, вилоят босқичига йўлланмалар тақсимланди.

Жорий йилнинг 28–29 апрель кунлари Нуробод туманидаги Спорт мактабида таълим соҳаси фидойиларини жисмоний тарбия ва спортга кенг жалб этиш мақсадида «Соғлом танда – сифатли таълим» шиори остида мусобақанинг ҳал қилувчи туман босқичи ўтказилди. Эътироф этиш жоизки, бу галги спорт беллашувлари олдинги йилларга нисбатан янада кўтаринки руҳда ва юқори ташкилий савияда ўтди. Устозлардан иборат жамоалар ўртасидаги баҳслар кескин, қизиқарли ва муросасиз лаҳзаларга бой бўлди.

Мусобақанинг жамоавий спорт турлари бўйича натижаларига кўра, қуйидаги жамоалар фахрли биринчи ўринни эгаллаб, Таълим ва фан ходимлари касаба уюшмаси Нуробод туман бўлинмаси кенгашининг махсус кубогини қўлга киритдилар:

• ⚽️ Мини футбол: 61-умумий ўрта таълим мактаби жамоаси;
• 🏐 Волейбол (эркаклар ўртасида): 55-мактаб жамоаси;
• 🏐 Волейбол (хотин-қизлар ўртасида): 34-мактабнинг волейболчи қизлар жамоаси.

Мусобақанинг якка тартибдаги баҳсларида эса қуйидаги иштирокчилар ўз йўналишларида тенгсиз деб топилди:

• ♟ Шахмат (хотин-қизлар): Г. Ўринова (11-мактаб);
• ♟ Шахмат (эркаклар): Б. Мавлонов (65-мактаб);
• ⚪️ Шашка (хотин-қизлар): М. Жўраева (1-мактаб);
• ⚪️ Шашка (эркаклар): А. Шарипов (2-мактаб);
• 🏓 Стол тенниси (хотин-қизлар): Н. Умарова (10-мактаб);
• 🏓 Стол тенниси (эркаклар): М. Туркманов (2-мактаб).

Фахрли биринчи ўринни эгаллаган ушбу ғолиб жамоалар ва иштирокчилар мусобақанинг навбатдаги – вилоят босқичига йўлланмани қўлга киритдилар. Тадбир якунида барча ғолиб ва совриндорлар Ўзбекистон таълим ва фан ходимлари касаба уюшмаси Нуробод туман бўлинмаси кенгаши томонидан эсдалик совғалари ҳамда махсус дипломлар билан тантанали равишда тақдирланди.