Ходимлар хавфсизлиги — доимий эътиборда: Иштихонда меҳнат муҳофазаси бўйича ўқув-семинар ўтказилди
Самарқанд вилоятининг Иштихон туманида жойлашган 96-умумий ўрта таълим мактабида муҳим амалий тадбир бўлиб ўтди. Унда Иштихон ва Қўшработ туманларидаги бошланғич касаба уюшмаси ташкилотларида меҳнат муҳофазаси бўйича бириктирилган вакиллар учун махсус ўқув-семинар ташкил этилди.
Ҳар қандай корхона, ташкилот ва муассасада ходимларнинг соғлом ҳамда хавфсиз меҳнат шароитларида ишлашини таъминлаш бугунги куннинг энг асосий талабларидан биридир. Бу борада, айниқса, жойлардаги бошланғич ташкилотларда меҳнат муҳофазасига масъул бўлган вакилларнинг билим ва малакаси муҳим аҳамият касб этади. Иштихон туманида икки туман вакилларини жамлаган ушбу семинар ҳам айнан шу мақсадга — ходимларнинг ҳуқуқий билимларини ошириш ва амалий кўникмаларини мустаҳкамлашга қаратилди.
Тадбир давомида иштирокчиларга соҳа мутахассислари томонидан қуйидаги йўналишлар бўйича тушунчалар берилди:
- Меҳнат муҳофазаси ва хавфсизлик техникаси бўйича қонунчиликдаги сўнгги ўзгаришлар;
- Иш жойларида бахтсиз ҳодисалар ҳамда касб касалликларининг олдини олиш чора-тадбирлари;
- Иш берувчи ва ходимлар ўртасида меҳнат шароитларини яхшилаш борасидаги жамоа шартномаларининг ижросини назорат қилиш.
Шунингдек, семинар давомида Иштихон ва Қўшработ туманлари вакиллари ўзаро тажриба алмашиб, жойларда учраётган муаммолар ва уларнинг ечимлари юзасидан фикр-мулоҳазалар юритдилар. Иштирокчилар ўзларини қизиқтирган барча саволларга мутахассислардан атрофлича жавоб олишди.
Бу каби ўқув-семинарларнинг мунтазам ўтказиб борилиши меҳнат жамоаларида хавфсизлик маданиятини юксалтиришга хизмат қилади. Семинарда олинган билим ва тавсиялар келгусида ҳар иккала тумандаги муассасаларда меҳнат шароитларини янада яхшилаш, ходимларнинг ҳаёти ва соғлиғини муҳофаза қилишда муҳим дастуриламал бўлиб хизмат қилиши шубҳасиз.
