Илм-фан ва экология уйғунлиги: Ботаника институти жамоаси «Яшил ечим» хакатонида мутлақ ғалабага эришди
Тошкент Ботаника боғида ташкил этилган «Formula 35» нуфузли фан фестивали доирасида экологик муаммоларга инновацион ва илмий ечимлар топишга қаратилган «Яшил ечим» Республика экологик хакатони бўлиб ўтди. Мазкур илмий беллашувда Ўзбекистон таълим ва фан ходимлари касаба уюшмаси аъзолари, хусусан, тизимдаги илмий-тадқиқот муассасалари вакиллари ҳам фаол иштирок этиб, ўзларининг интеллектуал салоҳиятини намойиш этдилар. Хакатон якунларига кўра, Ботаника институти жамоаси фахрли 1-ўринни эгаллаб, юксак натижа қайд этди.
Тадбирнинг асосий мақсади глобал ва минтақавий экологик таҳдидлар, айниқса, ер деградацияси ҳамда иқлим ўзгаришларининг салбий оқибатларини юмшатишга қаратилган илмий, амалий ва инновацион ташаббусларни қўллаб-қувватлашдан иборат бўлди. Анжуманнинг тантанали очилиш маросимида сўзга чиққан соҳа мутахассислари бугунги кунда мамлакатимизда табиатни муҳофаза қилиш, атроф-муҳит барқарорлигини таъминлаш ва илмий соҳа вакилларининг ғояларини ҳаётга татбиқ этиш давлат сиёсатининг устувор йўналишларидан бирига айланганини алоҳида таъкидладилар. Бунда Таълим ва фан ходимлари касаба уюшмасининг олимлар, ёш тадқиқотчилар ва мутахассисларнинг меҳнатини муносиб қадрлаш, уларни маънавий ҳамда ижтимоий қўллаб-қувватлаш борасидаги тизимли фаолияти юксак баҳоланди.
Хакатон дастури бир қатор муҳим йўналишларни қамраб олган бўлиб, унда мамлакатимизнинг кўзга кўринган илмий-тадқиқот муассасалари, олий таълим даргоҳлари ходимлари ва ёш олимлар ўзаро баҳслашдилар. Айниқса, «Шўрланиш ва чўлланишга қарши кураш» йўналиши бўйича тақдимотлар қизғин муҳокамаларга сабаб бўлди. Ботаника институтининг иқтидорли тадқиқотчиларидан ташкил топган жамоа тупроқ деградацияси, шўрланиш ва чўлланиш жараёнларининг олдини олиш, ер ресурсларини комплекс муҳофаза қилиш ҳамда флора оламини сақлаб қолишга доир чуқур асосланган илмий ишланмаларини тақдим этишди. Ҳакамлар ҳайъати лойиҳанинг долзарблиги ва амалиётга татбиқ этиш имкониятларини юқори баҳолаб, жамоани ушбу йўналишда тенгсиз деб топди.
Мазкур тадбирнинг илмий-амалий ва маданий-маърифий аҳамияти қуйидагиларда намоён бўлади:
• Илм-фан ва амалиёт интеграциясини таъминлаш орқали атроф-муҳит муаммоларини бартараф этишнинг замонавий механизмларини шакллантириш;
• Соҳа ходимлари, хусусан, ёш ботаник ва эколог олимларнинг касбий маҳоратини ривожлантириш ҳамда уларнинг ижодий салоҳиятини юзага чиқариш;
• Жамиятда экологик маданиятни ошириш, табиий бойликларни асраб-авайлаш туйғусини мустаҳкамлаш;
• Таълим ва фан фидойиларининг янги илмий ишланмаларини кенг жамоатчиликка танитиш ва соҳада соғлом рақобат муҳитини кучайтириш.
Тадбир якунида ғолиб ва совриндорлар муносиб тақдирланди. Илмий салоҳиятини намойиш этиб, биринчи ўринни қўлга киритган Ботаника институти жамоасига ташкилотчилар томонидан диплом ва эсдалик совғалари тантанали равишда топширилди.
Ўзбекистон таълим ва фан ходимлари касаба уюшмаси ўз аъзолари бўлган илм-фан намояндаларини, хусусан, Ботаника институти жамоасини ушбу улкан ғалаба билан самимий муборакбод этади. Касаба уюшмаси келгусида ҳам олимлар ва илмий изланувчиларнинг қонуний манфаатларини ҳимоя қилиш, уларнинг янгидан-янги ютуқларга эришишлари учун қулай шарт-шароитлар яратиш ҳамда илмий-ижодий фаолиятларини ҳар томонлама рағбатлантириш йўлида фидокорона хизмат қилишда давом этади.
