Касаба уюшмаси — меҳнаткашлар манфаати ва ижтимоий ҳимоясининг мустаҳкам таянчи
Хоразм вилояти Янгиариқ туманидаги 22-сонли умумий ўрта таълим мактабида 11 ноябрь — Ўзбекистон касаба уюшмалари куни муносабати билан “Касаба уюшмаси – меҳнаткашлар таянчи” мавзусида тантанали маданий-маърифий тадбир бўлиб ўтди. Ўзбекистон таълим ва фан ходимлари касаба уюшмаси Янгиариқ туман бўлинмаси кенгаши ташаббуси билан ташкил этилган ушбу тантана соҳа илғорлари, фидойи устозлар ҳамда меҳнат жамоаси фаолларини бир даврага жамлади. Тадбирда меҳнаткашлар ҳуқуқ ва манфаатларини ҳимоя қилиш, уларнинг ижтимоий қўллаб-қувватланишини таъминлаш борасида тизимда олиб борилаётган ислоҳотларнинг аҳамияти алоҳида қайд этилди.
Мамлакатимизда тараққиётнинг муҳим дастури сифатида қабул қилинган “Ўзбекистон–2030” стратегиясида фуқаролик жамияти институтларини, хусусан, касаба уюшмалари фаолиятини такомиллаштириш, ходимларнинг муносиб меҳнат шароитларига эга бўлишини таъминлаш устувор вазифалардан бири этиб белгиланган. 2021 йилдан буён юртимизда 11 ноябрь — Ўзбекистон касаба уюшмалари куни сифатида кенг нишонланиб келаётгани меҳнат аҳлига қаратилаётган юксак эътибор ва эҳтиромнинг ёрқин ифодасидир. Айни кунларда таълим ва фан ходимлари касаба уюшмаси тизимидаги барча бўғинларда меҳнаткашларнинг кайфиятини кўтариш, уларни моддий ва маънавий рағбатлантириш мақсадида маънавий-маърифий тадбирлар, саёҳатлар ва спорт мусобақалари қизғин ташкил этилмоқда.
Шундай мазмунли тадбирлардан бири Янгиариқ туманидаги 22-сонли умумий ўрта таълим мактаби меҳнат жамоасида кўтаринки руҳда ўтказилди. Учрашувда Ўзбекистон таълим ва фан ходимлари касаба уюшмаси Республика Кенгашининг Хоразм вилояти бўйича масъул ташкилотчиси М.Р.Раҳимова ҳамда касаба уюшмаси Янгиариқ туман бўлинмаси кенгаши раиси Г.Отажонова иштирок этдилар.
Тадбир давомида соҳа мутасаддилари томонидан касаба уюшмаларининг меҳнат муносабатларини тартибга солиш, ишчи-ходимларнинг ҳуқуқий ва ижтимоий-иқтисодий манфаатларини ишончли ҳимоя қилишдаги ўрни, жамоа шартномаларининг афзалликлари хусусида батафсил тўхталиб ўтилди. Шу билан бирга, меҳнат жамоасида фаолият юритаётган фидойи инсонлар меҳнатини эъзозлашнинг маънавий-маърифий жиҳатлари очиб берилди:
• Ходимларнинг қонуний ҳуқуқ ва эркинликларини таъминлашда бошланғич касаба уюшма қўмиталарининг фаоллиги ва масъулияти;
• Муассасада соғлом ва хавфсиз меҳнат шароитларини яратиш ҳамда ходимларнинг саломатлигини муҳофаза қилиш борасидаги тизимли ташаббуслар;
• Устоз ва мураббийларнинг самарали меҳнатини жамоатчилик ўртасида кенг эътироф этиш, уларнинг ижтимоий мақомини юксалтиришга қаратилган чора-тадбирлар.
Тадбир доирасида узоқ йиллардан буён касаба уюшма ҳаракатида фаол бўлиб келаётган фидойи ташкилотчилар меҳнати алоҳида эътироф этилди. Хусусан, мазкур мактаб бошланғич касаба уюшма ташкилоти қўмитаси раиси О.Бобожонованинг 21 йиллик самарали фаолияти юксак баҳоланди. Ушбу фидойи мураббийнинг нафақат жамоада ходимлар манфаатини ҳимоя қилишдаги жонкуярлиги, балки ўз касбига бўлган садоқати алоҳида таъкидланди.
Юбилей санаси — 55 ёшни қаршилаган О.Бобожонованинг кўп йиллик самарали ва намунали меҳнати инобатга олиниб, Ўзбекистон таълим ва фан ходимлари касаба уюшмаси Республика Кенгашининг Хоразм вилояти бўйича масъул ташкилотчиси М.Р.Раҳимова томонидан вилоят кенгашининг ташаккурномаси ҳамда эсдалик совғалари тантанали равишда топширилди.
Шунингдек, тадбир якунида туман бўлинмаси кенгаши раиси Г.Отажонова сўзга чиқиб, О.Бобожоновани муборак айём билан самимий қутлади ҳамда тармоқ ривожига қўшган ҳиссаси учун касаба уюшмасининг қимматбаҳо эсдалик совғаларини топширди. Тантанали руҳда ўтган мазкур тадбир соҳа фидойиларининг кучига куч, ғайратига ғайрат қўшиб, янги марралар сари руҳлантирди.
