Қашқадарё вилоятида ҳисобот-сайловларни ўтказиш бўйича амалий-ўқув семинари ташкил этилди
Жорий йилнинг 30 январь куни Тармоқ касаба уюшмаси томонидан Қашқадарё вилоятидаги бошланғич касаба уюшмаларида ҳисобот-сайловларни ўтказиш юзасидан амалий-ўқув семинари ташкил этилди. Семинарда шаҳар ва туман бўлинмалари кенгашлари, олий ўқув юртлари касаба уюшмаси қўмиталари ҳамда таянч бошланғич касаба уюшмаси ташкилотларининг раислари иштирок этдилар. Жами 50 нафар иштирокчи йиғилган мазкур тадбир касаба уюшмаларининг демократик асосда ишлашини таъминлаш, уларнинг фаолиятини такомиллаштириш ҳамда ҳисобот-сайлов жараёнларини янада самарали ўтказиш мақсадида ўтказилди.
Семинар дастури ва амалий кўрсатмалар
Семинарда иштирокчиларга ҳисобот-сайлов йиғилишларини ташкил этиш ва ўтказиш бўйича амалий кўрсатмалар берилди. Бунда битта бошланғич ташкилот мисолида ҳисобот-сайлов йиғилишининг барча жараёнлари амалий равишда намойиш этилди. Бу эса иштирокчиларга ўз ҳудудларидаги касаба уюшмаларининг ҳисобот-сайлов йиғилишларини самарали ташкил этишда муҳим тажриба бўлиб хизмат қилди.
Муҳокама ва савол-жавоблар
Тадбир давомида иштирокчилар томонидан кўплаб долзарб масалалар юзасидан саволлар берилди. Хусусан, ҳисобот-сайлов йиғилишларини ўтказиш тартиби, унинг ҳуқуқий асослари, касаба уюшмаси аъзоларининг фаолиятини кучайтириш, ташкилотлар ишини самарали ташкил этиш борасида кенг муҳокамалар ўтказилди. Мутасаддилар иштирокчиларнинг барча саволларига батафсил жавоблар бериб, уларга ҳуқуқий ва ташкилий жиҳатдан амалий ёрдам кўрсатдилар.
Сайловларни юқори савияда ташкил этишга келишиб олинди
Семинар якунида иштирокчилар бошланғич ташкилотларда ҳисобот-сайлов йиғилишларини юқори савияда, кўтаринки руҳда ташкил этишга келишиб олдилар. Шунингдек, ушбу жараёнда ошкоралик ва адолатлиликни таъминлаш, касаба уюшмалари аъзоларининг ҳуқуқ ва манфаатларини ҳимоя қилиш бўйича амалий таклифлар ишлаб чиқилди.
Ш. Кубаев,
Ўзбекистон таълим ва фан ходимлари касаба уюшмаси Республика кенгашининг Қашқадарё вилояти бўйича Масъул ташкилотчиси
