Нафосат ва билим соҳибаларига эҳтиром: Нукусда байрам шукуҳи
Баҳорнинг илк айёми — 8 март, Халқаро хотин-қизлар куни мамлакатимизнинг барча таълим даргоҳларида ўзгача қувонч ва кўтаринкилик билан нишонланмоқда. Хусусан, Ажиниёз номидаги Нукус давлат педагогика институтида ҳам фидокорона меҳнат қилаётган хотин-қизларга бағишланган тантанали тадбир бўлиб ўтди.
Институт жамоасининг гули ва кўрки бўлган аёл-педагоглар, ходималар ва олималарни шарафлашга бағишланган ушбу кечада самимий тилаклар ва юксак эътирофлар янгради.
Тадбирни институт ректори вазифасини вақтинча бажарувчи, ёшлар масалалари ва маънавий-маърифий ишлар бўйича биринчи проректор Қувондиқ Қодиров очиб берди. У ўз нутқида бугунги кунда юртимизда хотин-қизларнинг ижтимоий-сиёсий фаоллигини ошириш давлат сиёсати даражасига кўтарилганини таъкидлади. Айниқса, педагог аёлларнинг келажак авлод тарбиясидаги беқиёс роли, институтнинг илмий ва маърифий ютуқларида уларнинг ҳиссаси салмоқли эканини алоҳида қайд этиб, барча хотималарни яқинлашиб келаётган нафосат байрами билан қутлади.
Тантана давомида ректорнинг хотин-қизлар масалалари бўйича маслаҳатчиси Сайёра Бекчанова ҳамда институт Касаба уюшмаси қўмитаси раиси Караматдин Гулимбетовлар сўзга чиқиб, муассасада хотин-қизлар учун яратилган меҳнат шароитлари ва уларнинг ҳуқуқий ҳимояси ҳақида тўхталиб ўтдилар. Таъкидланганидек, институтда анъанавий тарзда ўтказиб келинаётган бу каби байрам тадбирлари жамоадаги меҳр-оқибат ва ҳамжиҳатлик муҳитини янада мустаҳкамлашга хизмат қилади.
Тадбирнинг энг ҳаяжонли қисми тақдирлаш маросими бўлди. Институтнинг ривожига, ёш авлодга билим бериш ишига ўз ҳаётини бағишлаган фидойи хотин-қизлар учун Касаба уюшмаси қўмитаси томонидан махсус тайёрланган байрам совғалари топширилди.
Гулларга ва табассумларга бурканган ушбу кеча нафақат совғалар, балки самимий дил изҳорлари билан ҳам иштирокчилар хотирасида ёрқин из қолдирди. Бу каби эътибор ва эҳтиром институтда фаолият юритаётган аёлларни янги илмий ва педагогик зафарларга руҳлантириши шубҳасиз.
