“Соғлом танда – сифатли таълим”: Тахиатошда таълим ходимлари ўртасида спорт мусобақалари ўтказилди
Ўзбекистон Республикаси Президентининг 2026 йил 16 февралдаги ПФ-22-сонли Фармони билан тасдиқланган “Маҳаллани ривожлантириш ва жамиятни юксалтириш йили” дастурлари ҳамда “Ўзбекистон-2030” стратегияси ижроси доирасида Тахиатош туманида таълим муассасалари ходимлари ўртасида “Касаба уюшмаси кубоги” спорт мусобақаларининг иккинчи босқичи юқори савияда ташкил этилди.
Мазкур тадбир соҳада меҳнат қилаётган педагог-ходимларнинг жисмоний фаоллигини ошириш ва соғлом турмуш тарзини кенг тарғиб қилиш мақсадида “Беш ташаббус олимпиадаси” доирасида ўтказилди.
Қизғин беллашувлар майдони
“Соғлом танда – сифатли таълим” шиорини ўзида мужассам этган мазкур спорт байрами жорий йилнинг 18 апрель куни тумандаги ихтисослаштирилган мактаб ҳамда 5-сонли умумтаълим мактабининг спорт базаларида бўлиб ўтди.
Муросасиз ва кўтаринки руҳда ўтган иккинчи (туман) босқичида муассасалардаги дастлабки саралашдан муваффақиятли ўтган 128 нафар ғолиб иштирокчилар ўзаро куч синашдилар. Педагоглар спортнинг қуйидаги турлари бўйича ўз маҳоратларини намойиш этишди:
- Мини-футбол;
- Волейбол;
- Шахмат ва шашка;
- Стол тенниси.
Касаба уюшмалари томонидан илгари сурилаётган бу каби ташаббуслардан асосий мақсад — таълим муассасалари ходимлари ўртасида соғлом турмуш тарзини қарор топтириш, уларнинг спортга бўлган қизиқишларини янада оширишдир. Қолаверса, спорт мусобақалари жамоаларда ўзаро дўстлик ва ҳамжиҳатлик муҳитини мустаҳкамлашга, иш жараёнидаги самарадорлик ва кўтаринки кайфиятни таъминлашга бевосита хизмат қилади.
Мусобақа якунларига кўра, ўз йўналишида энг яхши натижа қайд этган ғолиблар кейинги — Қорақалпоғистон Республикаси босқичига йўлланмани қўлга киритдилар.
Барча ғолиб ва фаол иштирокчиларга туман Мактабгача ва мактаб таълими бўлими ҳамда таълим ва фан ходимлари касаба уюшмаси Тахиатош туман бўлинмаси кенгаши томонидан алоҳида эътибор қаратилиб, диплом ва эсдалик совғалари тантанали равишда топширилди.
